Mäori

He aha a ACC?

Ko tā mātau mahi he āwhina ki te ārai i te tūpono wharatanga, ā, he āwhina anō i te hunga whara kia hoki wawe ai rātau ki te mahi me ngā mahi anō o ia rā.

Ka taea e ngā tāngata katoa o Aotearoa te tono āwhina i ACC – kāore he here e pā ana ki tō taipakeke, mēnā kei te mahi koe, kua whakatā koe, he ākonga, kei runga penihana rānei.

I te nuinga o ngā āhuatanga, kāore he aha mō te pānga mai o tō wharatanga – e kapihia ana e mātau te nuinga o ngā wharatanga ka pā mai i te kāinga, i te mahi, i runga i te rori, i ngā mahi hākinakina rānei.

Me pēhea te tiki āwhina i ACC

Ki te whara koe, ko te mea nui kia tirohia wawehia koe e tētahi ngaio hauora (pēnei i te tākuta, kairomiromi, tētahi tangata ngaio rānei i te hōhipera). Kaua e tatari, kei kino kē atu tō wharatanga.

Me haere koe kia kite i tētahi ngaio hauora i te tuatahi ki te tuku kerēme, i te mea ka taea noa iho e mātau te āwhina i a koe mēnā kua tuku kerēme koe mō tō wharatanga. Ka tukuna e rātau tētahi puka kua whakakīa ki a mātau, ā, ka whakamōhiohia koe e mātau mēnā kua whakaaehia tō kerēme.

Me pēhea tā mātau āwhina i a koe

Ki te whakaaehia tō kerēme, ko te tikanga ka taea e mātau te āwhina i a koe ki te utu i te maimoatanga me te whakarato anō i ētahi ratonga e pā ana ki tō wharatanga hei āwhina i a koe kia ora ai koe. Kei te āhua o tō wharatanga me ō hiahia anō e mōhiohia ai te āhua o ngā āwhina ka whakawhiwhia ki a koe, engari tērā pea ka uru mai ko te:

Maimoatanga

Ka taea e mātau te tuku āwhina mō ngā momo utu whānui e pā ana ki te hauora, tae noa ki ngā haerenga ki te tākuta, ngā momo maimoatanga mai i ngā ngaio hauora whānui, te hāparapara, whakaata whakarato me ngā utu ōta rongoā.

Te noho i tō kāinga

Mēnā kei te raruraru tō noho i te kāinga whai muri i tō wharatanga, ka taea e mātau te whakarite i ētahi āwhina pēnei i te whakapai whare, te tiaki i a koe me te tiaki tamariki.

Te āhua o tō mahi

Tērā pea ka utua koe e mātau ki te utu paremata (he momo utu auau) mēnā kāore koe e kaha ki te mahi nā tō wharatanga. Mēnā e hiahiatia, ka taea anō e mātau te whakarite i tētahi mahere whakamauoratanga kia pai ai tō hoki ki te mahi.

Otirā, i ētahi wā ka tere ake tō whakaoranga nā tō hoki atu ki te mahi. Tērā pea me whakarerekē e koe ētahi tūmomo mahi i te mahi kia pai ai koe, te whakaiti rānei i ō hāora mahi. Engari i roto i te wā roa, ka pai ake tēnei mō tō hauora me tō kiritau me te whiwhi pūtea tonu.

Te haere atu me te hoki mai i ngā wāhi me haere koe

Mēnā ka haere koe mā runga waka ki te mahi, ki te maimoatanga rānei, ka taea e mātau te utu i tētahi wāhanga o ngā utu kawe, ā, i ētahi āhuatanga, tētahi wāhi noho mō te pō.

Te whara kino

Mēnā he tino kino tō wharatanga, kāore taea i a koe ngā mahi tērā pea ka utungia koe he tōpūtanga moni, he motoka, whakahou whare rānei. Ka taea e mātau te āwhina i a koe me tō whānau kia waia ai te noho me tō wharatanga.

Ina mate ai tētahi nā te wharatanga

E wātea ana ētahi pūtea mai i a ACC ki te mate koe, tētahi rānei o tō whānau i te wharatanga.

Ngā tohutohu me te āwhina ahurea

He kaitohutohu Māori (me kī Pae Ārahi) ā mātau e whakarato ana i ngā whakamaōritanga reo, tohutohu ahurea me te tautoko i ngā kaimahi o ACC. E āwhina ana ēnei Pae Ārahi i ngā kaimahi ki te whakahauora me te tautoko i ngā kiritaki i roto i ngā āhuatanga ahurea tōtika.

E whakarato ana ngā Pae Ārahi i ngā tohutohu mo te reo me nga tikanga o te ao Māori ki ngā kaimahi o ACC i a rātau e āwhina ana i ngā kiritaki Māori. E tautoko ana ngā Pae Ārahi i ngā kaimahi katoa o ACC puta noa i te motu kia pai ai te urupare ki ngā hiahia a ngā kiritaki Māori.

Kei te hiahia pārongo anō koe?

Mēnā he pātai āu mō ngā āwhina a ACC ki te whakahauora i a koe mai i tō wharatanga, waea utu kore mai ki 0800101996. E wātea ana he kaiwhakamāori reo e taea te āwhina kia mārama ai te whakawhiti kōrero tētahi ki tētahi.

Last updated: 17 January 2014

Last reviewed: 17 January 2014